呢段野係轉載：路人甲 於 公元 2005年 1月 31日，19:13:24 時所吹既水．
好!大家好!話咁快又o係度同大家見面!今期想寫o下一D稍為嚴肅o既野!年紀細o既讀者可能會唔係太理解, 又或者覺得沉悶! 年長o既呢, 相信會有少少共鳴!
久不久,牛佬會收到某讀者來信,討論敝刊係咪值14蚊呢個問題, 有人認為敝刊唔掂,唔值!有人認為敝刊係佢地o既精神食糧,起值! 實則問題非常簡單, 就如各以相約價錢,購買唔同牌子o既汽車一樣,各有所好! 牛佬要講o既, 唔係呢一樣! 我要講o既, 係讀者提及呢個問題o既背後意識---期望古惑仔長存!
某讀者批評敝刊唔好, 乃恨鐵不成鋼! 佢地好想古惑仔做得好似以前, 又或者好過以前!
某讀者大力支持敝刊, 係發乎真心o既愛戴, 希望古惑仔穩步向前, 繼續為大家提供娛樂!
兩者讀者心態, 都係為本書好! 我首先係度代表古惑仔多謝大家!
只係牛佬認為應該知道一樣野----就係現今o既古惑仔無論做得幾好, 亦必然有淹沒的一日!
點解呢?如下－－－
１）呢個世界所有野，必然有其規律性，起承轉合，春夏秋冬！當所有燃料耗盡時候，就係其終結之時！敝刊唔會例外！試諗下，佢已經創造左唔少驕人成績－１佢係近代江湖連環圖o既表表者，２佢係首部改編推上銀幕而票房理想o既連環圖， ３電影直接間接將古惑仔，陳浩南，山雞呢一類字眼，推向全東南亞！４古惑仔出版至今，壽命已逾七百期數，在港產連環圖中，只次於龍虎門及李小龍！打後日子，仍在持續追趕！５歷史性成功開創三日刊，６出版至今，仍然暢銷！就以上成績來看，佢已經邁過春夏o既季節，黎緊o既， 只有秋涼同埋嚴冬，唔好期望有第二春，第三春，呢類特殊例子，唔會多！細心諗下其他曾經暢銷書皇，邊本做到呢種異數？算呢本野聽日即刻係世界上消失，佢已經完成自己出人頭地o既使命！
２）人，係有急流湧退O既，尤其係男人，口口聲聲要急流勇退o既藝人，幾年之後又會見到佢，日本大導黑澤明拍戲拍到全世界呱呱叫果陣，依然係咁拍，直到遇上’沒有季節的小墟’o既慘情，仍然要拍下去， 所以，牛佬亦會一樣畫下去，直到觀眾放棄我為止！o係凋萎之前，難免軟弱無力！觀眾會見得到，亦係無可避免o既事實，唔係今日就係聽日，唔係出年就係後年，只要觀眾比牛佬長命，就會見到一個人衰退o既過程！
寫左兩大劈字，想講乜呢？係想觀眾知道，只要對敝刊不離不棄，必然見到佢巢皮的一日，為遠光芒，只係神話，愛護敝刊既讀者，應該用一份平常心，一期一期咁享受落去，直至佢失去所有光芒為止
我所講o既，係事實，亦係人生！